Hassa Ordusu alay ve taburlarının tamamen Martini tüfekler ile teçhiz edilmek üzere olduğu
Sa’âdetlü Efendim Hazretleri,Sâye-i kudret-vâye-i cenâb-ı pâdişâhîde bu kerre Hâssa ordû-yıhümâyûnu nizâmiye alây ve tabûrlarının kâmilen Martini Henry tüfekleriyle teslîh ü techîzi husûsuna irâde-i seniyye-i hazret-i şehriyârî müte’allik ve şeref-sünûh buyurularak icrâ-yı îcâbına teşebbüs ve ibtidâr olunmuş olduğu cihetle mezkûr tüfeklerin sökülüp takılması ve tathîr ü tanzîfi hakkında lüzûmu olan âlât u edevâtın dahî hemen alay ve taburlara tevzî’ ü i’tâsılâzimeden olduğuna ve edevât-ı mebhûsanın Taphâne-i ‘Âmire’de i’mâl ve ihzârı karâr-ı mahsûs iktizâsından olmasına nazaran şimdiye kadar bir haylisinin tehiyye ve ihzâr olunmuş olduğu me’mûl idüğüne mebnî bunların mevcûdu olduğu hâlde hemen anbarına teslîmi ve mevcûdu olmadığı sûrette ordû-yı mezkûrun yirmi sekiz taburu için tevzî’ olunmakta olan yirmi iki bin bu kadar tüfeğe göre lüzûmu kadar edevâtın müsâra’aten i’mâl ü ihzârıesbâbının sür’at-i istihsâliyle keyfiyetin iş’âr u inbâsı bâbında emr ü irâde efendim hazretlerinindir.
Fî 7 Rebî’ül-âhir sene 293; fî 18 Nisan sene 92.
Re’fet (?)
Devletlü Efendim Hazretleri,
Müfâd-ı emr ü iş’âr-ı sâmî-i cenâb-ı riyâset-penâhîleri karînimdir ki ‘âcizânem olarak Tophâne-i ‘Âmire meclisine lede’l-havâle zikr olunan yirmi sekiz tabûra tevzî’ ü i’tâ olunmakta bulunan Martini Henry tüfekleriçün i’tâsıîcâb eden âlât u edevâttan mezkûr tüfeklerin sökülüp takılmasına mahsûs olanların elde bulunan sekiz tabûrluğu şu günlerde hitâm bulacağı cihetle teslîm edileceği müsüllü kusûru dahî yine bu tüfeklerin yedek edevâtıyla berâber bir taraftan bi’l-i’mâl hitâm buldukça verileceği der-kâr ve tathîr ü tanzîfe ‘âid olup hîn-i iktizâda harbîler ucuna takılarak isti’mâl edilmek üzere beher onbaşıya birer aded olarak verilmesi îcâb eden ve İngilizce ismi huzûr-ı‘âlî-i âsaf-ânelerine takdîm kılınmış olan pusulada gösterilen forçanın Tophânece mevcûdu olmayıp i’mâli dahî müşkülâtı dâî idüğünden şimdilik bu forçadan on bin aded bi’l-mübâya’a irsâliçün me’mûran Amerika’da bulunan Mirlivâ Sa’âdetlü Tevfîk Paşa’ya teblîgât îfâsı iktizâ edeceği âşikâr olup âlât u edevât-ı mebhûsa der-âkab kâmilen tedârik ü i’tâ olunmuş olsa bile mezkûr tüfeklerin nezâket-i ma’lûmeleri îcâbınca leffen takdîm kılınan İngilizce ta’lîm-nâmesinde münderic olduğu üzere efrâd-ı askeriyye tarafından sökülüp takılmaları aslâ câiz olmayarak lede’l-hâce tabûrlar tüfekçileri ma’rifetleriyle sökülüp takılması lâzım geleceği cihetle âlât u edevât-ı mebhûsanın bu ustalara teslîmi lâ-büdd olup ma’a-hâzâ mezkûr tüfekleri söküp takacak ustaların da evvel-emirde Tüfenk-hâne-i ‘Âmire’ye gelerek usûlünü müşâhede ve tahsîl etmedikçe tüfekleri söküp takmalarında mazarrat müşâhede olunacağışüpheden berî bulunmak cihetiyle zikr olunan tüfeklerin verileceği tabûrlar tüfekçi ustalarının usûl-i mezkûreyi tahsîl ile bir kâ’ide şahâdet-nâmelerini alıp ‘avdet etmek üzere hemen Tüfenk-hâne-i mezbûra i’zâmları elzemiyeti bedîdâr idüğünün huzûr-ı ‘âlî-i âsaf-ânelerine ‘arz u izbârımeclis-i mezkûrdan ifâde olunmağın ol-bâbda emr ü fermân hazret-i men-lehu’l-emrindir.
Fî 11 Rebî’ül-âhir sene 293; fî 22 Nisan sene 292.
Seyyid bin Tevfîk
Kaynak: Vikikaynak · Telif süresi dolmuş eser