Gazel (âhımız redifli)

Enderunlu Vasıf

Zulmet-resân-ı âlem olub dûd-i âhımız
İntâc-ı matlab etmedi baht-ı siyâhımız

Şükrâne-i kudûmuna cân eyleriz fidâ
Âyin-i aşk içinde budur resm-i râhımız

Fâni değil mi kârgeh-i devr-i kâinât
Olsa aceb mi nakş ber-âb izz ü câhımız

Etmiş ihâta zülf-i siyeh rû-yi âlini
Olmuş nihân zîr-i hicab içre mâhımız

Etsek meta-ı vasla nukûd-ı vücûdı sarf
Gencînelerle hâsıl olur mı refâhımız

Vâsıf nedir kabâhat ü ısyânımız aceb
Affeylemez o şûh-ı sitem-ker günâhımız

Kaynak: Vikikaynak · Telif süresi dolmuş eser