Canımı Uryân Edüp Saldım Bu Aşk Deryâsına

Eşrefoğlu Rumi

Canımı uryân edüp saldım bu aşk deryâsına
Nâgehân aşkın sataştım dürr-i bî hemtâsına

Can u baş u din ü dünya verdim aldım derd-i yâr
Merhem ol derd oldu ancak yüreğim yarasına

İlm ü akl ü zühd ü takva çün hicâb oldu bana
Külli sevdadan geçüp düştüm anın sevdâsına

Mâsivâdan göz yumup gördüm anın didârını
Kendüzümden el yudum girdim fenâ sahrâsına

Ol fenâdan bir fenâya bir fenâdan key fenâ
Key fenâdan sonra eriştim anın bekâsına

Bir bekâdır ol bekâ hergiz fenâ irmez ana
Aklını ko gel eresin bu sırrın mânâsına

Akl ile aşka girilmez aşk aklı mahv eder
Akl aşkın ol sebebden gelemez yurasına

Âkil ister cennet ü hûr ü kusûr gılman ola
Âşıkın hiç meyli yoktur cennet ü ni'mâsına

Âşık ol kim göresin Dost yüzünü bunda bugün
Mağrûr olma zahidin ol va'de-i ferdâsına

Va'de-i ferdâya göymez âşık-ı şûrîdeler
Göz karar derd ü şer erer zülfünün karasına

Eşrefoğlu Rumî aşkdan hoş haber verdi yine
Müddeinin hiç kulak urmaz kuru dâ'vâsına

Müddeinin her sözünde vardurur niçe garaz
Tâlib isen girme zinhâr müddei arasına

Kaynak: Vikikaynak · Telif süresi dolmuş eser