Işk Beni Yağma Kılupdur Sen Beni Sorma Bana

Eşrefoğlu Rumi

'Işk beni yağma kılupdur sen beni sorma bana
Ben beni bilemezem nite haber virem sana

Nûş idelden ol harâbât-ı muğânun câmını
Aklum esrük canum esrük ne sorarsın esrüge

Ol şarâbı kim ben içdüm fariğ-i peymâneden
Sâkîsi ol bâkî yüzdür cehd idüp iriş ana

Bu vücûdum katresin bahre irürdüm mest olup
Bu kımıldum mevc-i deryâdur direm önden sona

Sûretüm 'âşık velî içüm tolu mâ'şuk benüm
'Âşık u ma'şûk u 'ışk birdür hemân kalma tana

Gel bu birlik şerbetinden bir kadeh nûş eyle kim
Bir bakup bir göresin tağılmayasın dört yana

Ben bu birlik didüğüm yoklukdur anlarsan sözi
İkilik bu varlığun komaz varasın aslına

Sen bu yoklukdan kaçarsın bir işit yokluk nedür
Bir mücellâ âyinedür dost yüzin görmeklige

Eşrefoğlı Rûmî ikilik defterin yakdı oda
Bir olup birlik bulup berkitdi birle birlige

Kaynak: Vikikaynak · Telif süresi dolmuş eser