Dostum Çün Yüze Gülmek Eylemişsin Hu Sana

Mihri Hatun

Dostum çün yüze gülmek eylemişsin hu sana
Yüri iy herca'i var şimden gerü ya hu sana

Gel akıtma gözlerümün kanlu yaşın sevdügüm
Ocaguna su koyar hayr itmez āhir bu sana

Çeşmine cān virdün ey dil pendümi gūş itmedün
Gör nice sihr etdi āhīr bu iki cādū sana

Öldürürsen lāʿlün ābı hayret ile ger beni
Teşne cāndır Hak tatturmasun bir içim su sana

Zulmet-i gamda kodıysa seni yārün gam yime
Bulunur Mihrī cihāndur yine bir meh-rū sana

vezni:Fāʿilātün fāʿilātün fāʿilātün fāʿilün

Kaynak: Vikikaynak · Telif süresi dolmuş eser