Ol Saçı Sünbül Yüzi Bedr Aya Sıhhat Yaraşur

Mihri Hatun

Ol saçı sünbül yüzi bedr aya sıhhat yaraşur
Ol ruhı lâle lebi hamrâya sıhhat yaraşur

Ol güzeller içre bî-hemtâ vü ra'nâ lâ-nazîr
Nâzenînler serveri garrâya sıhhat yaraşur

Ol şeh-i hûbân-ı 'âlem hüsn içinde bî-bedel
Ol gözi şehlâ kadi bâlâya sıhhat yaraşur

Ol perî-peyker melek-manzar yüzi gül gonca-leb
Gamzesi ok ol kaşı hem yaya sıhhat yaraşur

Ol Süleymân-ı zamânuñ müntehâ cânânesi
Ol semen-sîmâ güzel havrâya sıhhat yaraşur

İmdi Mihrî bu kelâmı cân u dilden di müdâm
Ol saçı sünbül yüzi bedr aya sıhhat yaraşur

Redd-i matla' gazelidir.

Kaynak: Vikikaynak · Telif süresi dolmuş eser