Sen Kılmadugun Derdüme Dermanı Unıtma

Mihri Hatun

Sen kılmaduguñ derdüme dermânı unıtma
Ben hasret ile virdügüm ol cânı unıtma

Kanlu yaşum irdükçe revânlar idüben âh
Çâk itdügüm ey dost girîbanı unıtma

Dil-berler ile sen güle gezdükçe habībüm
Hicrüñde olan dîdesi giryânı unıtma

Lutfuñla ʿimâret kılıcak müddeʿî gönlin
Cevrüñle yıkılmış dil-i vīrânı unıtma

Kıldukça hamâʿil kolını boynuña agyâr
Zülfüñ gibi ben göñli perîşânı unıtma

Bir kerre kadem basmaga cânâ yüzüm üzre
ʿAhd etmiş idüñ gel berü peymânı unıtma

Biñ yıl ki felek devr ide ʿâşık saña cânâ
Getürmeye bir Mihrî gibi anı unıtma

Kaynak: Vikikaynak · Telif süresi dolmuş eser